21 лютага адзначаецца міжнародны Дзень роднай мовы

  Міжнародны дзень роднай мовы адзначаецца штогод 21 лютага з мэтай узняць пытанні моўнай і культурнай разнастайнасці і шматмоўнасці. Гэта дата была ўпершыню абвешчана ЮНЭСКА 17 лістапада 1999 года.

  Адзначэнне гэтага дня было таксама прызнана Генеральнай асамблеяй ААН у яе рэзалюцыі 2008 года, якая абвяшчала гэты год Міжнародным годам моў.  Міжнародны дзень роднай мовы паўстаў як вынік міжнароднага прызнання Дня руху за мову, які адзначаецца ў Бангладэш з 1952 года. У тым годзе шмат студэнтаў былі забітыя пакістанскай паліцыяй у горадзе Дака падчас пратэстаў, арганізаваных Рухам за мову бенгалі. Для жыхароў нашай краіны гэты дзень адметны ўвагай і клопатам пра беларускую мову, мову народа, які спрадвеку жыў на зямлі ад Брэста да Полацка, ад Гомеля да Віцебска, у Наднямонні і Прыдзвінні, у Прыдняпроўі і Надсожжы…
  І няхай нехта сёння спрабуе сцвердзіць, што для большасці сучасных беларусаў родныя іншыя мовы, гэта, мякка кажучы, памылкова. Беларускімі словамі гаварылі многія пакаленні нашых землякоў, мова генетычна жыве ў памяці іх дзяцей і ўнукаў. Трэба толькі дапамагчы адчуць сённяшнім пакаленням багацце і прыгажосць роднага слова, вярнуць яго з памяці генетычнай у жыццё, у побыт людзей.

  Пра гэта мы гаворым у нашых перадачах, спакойна, разважліва, без залішняй экзальтацыі і якога-небудзь супрацьстаяння. У нашай краіне жывуць людзі, для якіх родныя мовы армянская і цыганская, казахская і польская … У іх таксама свята, бо наша краіна дае магчымасць ім вольна размаўляць і вучыць іх родныя мовы. Але найперш мы павінны памятаць запавет класіка айчыннай літаратуры Францішка Багушэвіча – “не пакідайце ж мовы нашай беларускай …”. Ён і сёння гучыць надзвычай актуальна.